ភ្នំពេញ: ក្រោមគម្រោងយុទ្ធនាការ ជួសជុលកែលំអឡើងវិញ នូវផ្លូវសរុបចំនួន៥៧ខ្សែ នៅក្នុងចំនួន៩ ក្នុងរាជធានីភ្នំពេញ ដែលទទួលការខូចខាត ដោយសារទឹកភ្លៀង និងដោយសាររថយន្ត ដឹកធ្ងន់លួចចូលក្រុង ក្នុងរដូវវស្សាកន្លងមក នៅព្រឹកថ្ងៃទី១០ ខែមករា ឆ្នាំ២០១៧នេះ រដ្ឋបាលរាជធានីភ្នំពេញ បានប្រារព្វពិធីបើក ការដ្ឋានជួសជុលផ្លូវ ដោយចាក់អ៊ុតកៅស៊ូ នៅលើផ្លូវចំនួន ៣ ខ្សែបន្ថែមទៀត ក្នុងចំណោមផ្លូវ១៧ខ្សែ នៅក្នុងខណ្ឌចំការមន។
ផ្លូវទាំង៣ខ្សែ ដែលបើកការដ្ឋាន ជួសជុល ដោយមានការសម្រួលគ្រឹះ និងការចាក់អ៊ុតកៅស៊ូឡើងវិញ ជាលើកទី៤ នៅក្នុងខណ្ឌចំការមននេះ រួមមាន ទី១ ផ្លូវលេខ១៦៧ (ចាប់ពីផ្លូវលេខ២៤៥ រហូតដល់ ផ្លូវលេខ៤៥០) ស្ថិតក្នុងសង្កាត់ទួលទំពូង២ ។ ទី២ ផ្លូវលេខ២៨៤ (ចាប់ពីមហាវិថីព្រះសីហនុ រហូតដល់ផ្លូវលេខ១៦៣) ស្ថិតក្នុងសង្កាត់អូឡាំពិក និងសង្កាត់ទួលស្វាយព្រៃទី២ ។ ទី៣ ផ្លូវលេខ៤៨៤ (ចាប់ពីរង្វង់មូល ផ្សារដើមថ្កូវ រហូតដល់ផ្លូវលេខ៩៣) ស្ថិតក្នុងសង្កាត់បឹងត្របែក និងសង្កាត់ផ្សារដើមថ្កូវ។
លោក ស៊ុយ សេរិទ្ធ អភិបាលរង រាជធានីភ្នំពេញ បានលើកឡើងថា ការស្តារ នៃផែនការហេដ្ឋារចនា សម្ព័ន្ធនៅតាមមូលដ្ឋានសង្កាត់ ខណ្ឌនេះ គឺជាការអនុវត្តន៏ ទៅតាមប្រសាសន៍របស់ ប្រមុខរាជរដ្ឋាភិបាល សម្តេចអគ្គមហាសេនាបតីតេជោ ហ៊ុន សែន ដែលបានផ្តល់នូវ ផ្លូវចំនួន៥៧ខ្សែ ជូនដល់ប្រជាពលរដ្ឋ ក្នុងរាជធានីភ្នំពេញ សម្រាប់ជាចំណងដៃ ក្នុងឱកាសបុណ្យចូលឆ្នាំខ្មែរ នាពេលខាងមុខនេះ។
លោកអភិបាលរង បានបញ្ជាក់ថា ជាទិសដៅរបស់ថ្នាក់ដឹកនាំ គឺធ្វើយ៉ាងណាបំពេញការទាមទារ ឬការសុំណូមពររបស់ប្រជាពលរដ្ឋ ឲ្យបានលើតម្រូវការ សម្រាប់ជីវភាពរស់ នៅប្រចាំថ្ងៃ។ ជាក់ស្តែងនៅពេលនេះ តាមការស្នើសុំធ្វើផ្លូវនៅតាមមូលដ្ឋាន របស់ប្រជាពលរដ្ឋ តាមរយៈលោកចៅសង្កាត់ លោកអភិបាលខណ្ឌ និងអាជ្ញាធររាជធានីភ្នំពេញ សុំគោលការបន្តសុំការអនុញ្ញាត ពីរាជរដ្ឋាភិបាល នៅពេលនេះ ប្រមុខរាជរដ្ឋាភិបាល ក៏បានសម្រេចឲ្យរដ្ឋបាលរាជធានីភ្នំពេញ បើកយុទ្ធការធ្វើផ្លូវដោយចាក់កៅស៊ូជូនបងប្អូន ដើម្បីឲ្យហេដ្ឋារចនាសម្ព័ន្ធនៅរាជធានីភ្នពេញ បានកាន់តែល្អប្រសើរឡើង ជូនបងប្អូន។
ក្នុងនោះឱកាសនោះលោកក៏បានអំពាវនាវដល់បងប្អូនប្រជាពលរដ្ឋ ដែលទទួលផលដោយផ្ទាល់ពីផ្លូវទាំងអស់នេះ សូមចូលរួមមើលថែទាំងអស់គ្នា និងចូលរួមតាមដានការអនុវត្តការងារចាក់អ៊ុតកៅស៊ូរបស់ក្រុមហ៊ុន ព្រមទាំងមានការយោគយល់ និងសហការក្នុងពេលការដ្ឋានកំពុងដំណើការ។ ជាមួយនេះលោកអភិបាលរងរាជធានីភ្នំពេញ ក៏បានរំលឹកដល់ក្រុមហ៊ុនទទួលការងារនៅផ្លូវទាំងនេះ ត្រូវបំពេញការងាររបស់ខ្លួនអោយបានត្រឹមត្រូវ ជៀសវាងការធ្វើខុសកិច្ចសន្យា ឬខុសលក្ខណៈបច្ចេកទេស និងអនុវត្តការងារប្រកបដោយក្រមសិលធម៌ ដើម្បីលប់បំបាត់អោយបានដាច់ខាតនូវពាក្យបែបកំប្លែងថា ផ្លូវធ្វើជាប់ ឬចាក់ស្តើងស៊ីក្រាស់ ចាក់ក្រាស់ស៊ីស្តើង។
សូមបញ្ជាក់ថា ចំណងដៃពីប្រមុខរាជរដ្ឋាភិបាល ដែលបានឲ្យមករាជធានីភ្នំពេញ ជាការដូរធ្វើផ្លូវ ជូនប្រជាពលរដ្ឋនៅរាជធានីភ្នំពេញ ហើយផែនការផ្លូវភ្នំពេញនេះ គឺទូលំទូលាយណាស់រហូតដល់៥៧ខ្សែ ស្មើ៦៤គីឡូម៉ែត្រ ហើយផ្លូវដែលនិងស្តារ ចាប់ពីថ្ងៃនេះតទៅ តាមផែនការក្នុងចំណោម៥៧ខ្សែ គឺមាន១៧ខ្សែនៅចំការមន។ ជាមួយនេះសាលារាជធានីភ្នំពេញ ក៏គ្រោងនឹងធ្វើផ្លូវ១៧៥គីឡូម៉ែត្រទៀត នៅក្នុងភូមិសាស្ត្ររាជធានីភ្នំពេញ បន្ថែមលើយុទ្ធនាការទាំង៥៧ខ្សែ ក្នុងផែនការឆ្នាំ២០១៦ ដើម្បីឲ្យប្រព័ន្ធគមនាគមន៍នៅរាជធានីភ្នំពេញបានកាន់តែល្អប្រសើរឡើង៕
CEN
ដោយ: ដាវុធ
No comments:
Post a Comment