អ្នកប្រដាល់ជើងខ្លាំងកម្ពុជាពីររូប នឹងត្រៀមជួបប្រកួតជាមួយអ្នកប្រដាល់ថៃ នៅក្នុងកម្មវិធីប្រដាល់Black Catនៅសង្វៀនSEA-TV យប់ថ្ងៃអាទិត្យទី០៨ ខែមករា ឆ្នាំ២០១៧នេះ។ ក្នុងនោះ សូត្រ ប៊ុនធី អ្នកប្រដាល់ក្លិបបក្សីស្លាបដែក ត្រូវជួបជាមួយអ្នកប្រដាល់ថៃឈ្មោះPhek Rabkhav ។ ពួកគេប្រកួតគ្នាក្នុងប្រភេទទម្ងន់៦០ គីឡូក្រាម។
Phek Rabkhav នេះ ជាអ្នកប្រដាល់ថៃចំណូលថ្មី គេមិនធ្លាប់មកប្រកួតនៅកម្ពុជាទេកន្លងមក ។ បើតាមលោក ញាណ សុធី អ្នកផ្គូផ្គងប្រចាំសង្វៀនSEA-TV បានប្រាប់ឲ្យដឹងថា Phek Rabkhav នេះ គេជាអ្នកប្រដាល់ជើងខ្លាំងស្រករក្រោយនៅស្រុកថៃ ក្នុងប្រភេទទម្ងន់៦០គ.ក្រនេះ ។ អ្នកប្រដាល់ថៃរូបនេះ គេវាយខ្លាំងនិងល្អ ។
អ្នកប្រដាល់ថៃរូបនេះ មានកំណត់ត្រាប្រកួតចំនួន៦៥លើក ឈ្នះ៥២លើក ចាញ់១៣លើក និង មិនដែលស្មើទេ ។ ទោះជាយ៉ាងណា អ្នកប្រដាល់ថៃរូបនេះ មិនប្រាកដថាអាចឈ្នះសូត្រ ប៊ុនធី បាននោះឡើយ ព្រោះថាប៊ុនធីពេលនេះ គេរឹងមាំទាំងកាយសម្បទា ខ្លាំងទាំងស្នៀតប្រដាល់ បន្ទាប់ពីគេជួបប្រកួតជាមួយថៃច្រើននាក់កន្លងមកនេះ។
សូត្រ ប៊ុនធី ឥឡូវគេជាជើងខ្លាំងស្រករក្រោយរបស់កម្ពុជាក្នុងប្រភេទទម្ងន់៦០គីឡូក្រាមនេះ ។ក្រោយពេលឆ្លងកាត់ការប្រកួតជាមួយថៃ១៨លើក ដោយឈ្នះ ៩ លើក ចាញ់ ៣ លើក និងស្មើ៦លើកនោះ បានធ្វើឲ្យគេមានបទពិសោធន៍ច្រើនក្នុងការប្រកួត ដោយគេវាយជាមួយថៃដូចវាយជាមួយខ្មែរគ្នាឯងអីចឹង គឺគ្មានញញើតខ្លាចអ្វីបន្តិចទេ ។ ប៊ុនធី មានកណ្តាប់ដៃល្អ វាយចេញចូលរហ័ស ហើយស្នៀតទាត់និងជង្គង់ កែង ក៏ល្អថែមទៀត ។
Phek Rabkhav អ្នកប្រដាល់ថៃរូបនេះ មានកម្ពស់ទាបជាងសូត្រ ប៊ុនធីបន្តិច គឺ១,៦៨ម៉ែត្រ ខណះដែលប៊ុនធីគេមានកម្ពស់១,៧១ម៉ែត្រ ។ តែប្រវត្តិប្រកួតរបស់ពួកគេទាំងពីរគឺប្រហាក់ប្រហែលគ្នាទេ ដែលសូត្រ ប៊ុនធី អ្នកប្រដាល់កម្ពុជាយើងប្រកួតបានចំនួន៨៤លើក ឈ្នះ៦៨លើក ចាញ់១៣ លើក និងស្មើ៦លើក។
ការប្រកួតលើកចុងក្រោយជាមួយថៃ ប៊ុនធីវាយចាញ់ Yorth Sayam ដោយពិន្ទុ ។ ជាអ្នកប្រដាល់ដែលមានកាយសម្បទាល្អ ខ្ពស់ ដៃជើងវែងនោះ អំណោយផលក្នុងការប្រើជង្គង់ កែង ហើយកណ្តាប់ដៃលឿន រហ័ស និងខ្លាំងនោះ ប៊ុនធី វាយមិនញញើតនោះឡើយ។
ចាំមើល រវាងសូត្រ ប៊ុនធី និង Phek Rabkhav ជួបគ្នាលើកនេះ តើនរណាឈ្នះនោះ ? ។
ចំពោះ វៀត ប៊ុនឌឿន អ្នកប្រដាល់សមាគមកីឡាក្រសួងការពារជាតិ គេនឹងត្រូវស្វាគមន៍អ្នកប្រដាល់ថៃឈ្មោះYorth Mongkul ដោយប្រកួតក្នុងទម្ងន់៦០គីឡូក្រាមដែរ ។ អ្នកប្រដាល់ថៃរូបនេះ មិនធ្លាប់មកស្រុកខ្មែរទេពីមុនមក។
ជាលើកទី២ សម្រាប់វៀត ប៊ុនឌឿនហើយ ដែលបានជួបប្រកួតជាមួយថៃនេះ ។ ក្នុងការជួបថៃលើកមុននោះ ប៊ុនឌឿនវាយចាញ់Reda ក្នុងទឹកទី៤ ។ ដូច្នេះលើកនេះ មិនដឹងថាវៀត ប៊ុនឌឿន អាចយកឈ្នះYorth Mongkul បានឬក៏អត់នោះទេ? ។
វៀត ប៊ុនឌឿន ជាអ្នកប្រដាល់ជើងចាស់ ដែលមានចិត្តអំណត់ខ្ពស់ វាយមិនឆេវឆាវ ហើយកណ្តាប់ដៃ និងជើងទាត់ គឺជាស្នៀតប្រចាំត្រកូលរបស់គេ ។ ប៊ុនឌឿនមានប្រវត្តិប្រកួត៧២លើក ក្នុងនោះវាយឈ្នះ៥៧លើក ចាញ់១៣លើក និង ស្មើ០២លើក។
សម្រាប់ការប្រកួតលើកនេះ វៀត ប៊ុនឌឿន មិនដឹងថាអាចយកឈ្នះ Yorth Mongkul នេះបានឬអត់នោះទេ?ព្រោះអ្នកប្រដាល់ថៃរូបនេះ គេវាយខ្លាំងហើយថែមទាំងមានផ្លែល្អថែមទៀត ។ ដូច្នេះ ចាំមើល រវាង Yorth Mongkul និង វៀត ប៊ុនឌឿន តើនរណាជាអ្នកឈ្នះនៅក្នុងការជួបប្រកួតគ្នានេះ ? ។
ចំពោះការប្រកួតរវាងអ្នកប្រដាល់រួមជាតិវិញ អ្នកប្រដាល់ អ៊ុំ កំសត់ អ្នកប្រដាល់ក្លិបព្រៃទទឹងខេត្តបាត់ដំបង ត្រូវគេផ្តល់ឪកាសអោយជួបប្រកួតសាកកណ្តាប់ដៃជាមួយចេង គា អ្នកប្រដាល់ក្លិបសាលវ័ន្តកីឡា។
អ្នកប្រដាល់ពីររូបនេះ មិនធ្លាប់ដែលប៉ះគ្នាទេកន្លងមក ។ ពីរនាក់នេះ មានកាយសម្បទាប្រហាក់ប្រហែលគ្នា ប៉ុន្តែចិត្តប្រដាល់របស់ពួកគេខុសគ្នា។គូនេះ ប្រកួតគ្នាក្នុងប្រភេទទម្ងន់៦៣,៥០០ គីឡូក្រាម។
អ៊ុំ កំសត់ គេមានផ្លែល្អ ចិត្តប្រដាល់ធំ ហើយទិចនិចប្រកួតក៏សំបូរបែបដែរ ព្រោះគេជាអ្នកប្រដាល់ជើងខ្លាំងស្រករក្រោយ ។ ការប្រកួតចុងក្រោយ អ៊ុំ កំសត់វាយឈ្នះសេក គឹមភាព អ្នកប្រដាល់ក្លិបអង្គរមានជ័យខេត្តសៀមរាប ដោយពិន្ទុ ។ ចំណែកចេង គា គេវាយក៏មានផ្លែល្អដែរ គ្រាន់តែពិបាករឿងយឺតនិងចិត្តតូចប៉ុណ្ណោះ។ និយាយរួម អ៊ុំ កំសត់គេល្អនិងខ្លាំងជាងចេង គា ។ ចេង គាប្រកួតចុងក្រោយវាយចាញ់រឿង សារ័ត្ន អ្នកប្រដាល់ក្លិបកងពលតូចទ័ពឆ័ត្រយោង៩១១ដោយពិន្ទុ ។
ទោះជាយ៉ាងណា សំរាប់ការជួបប្រកួតគ្នាលើកដំបូងនេះ ក្រុមអ្នកវិភាគប្រដាល់គេមានជំនឿចិត្តលើអ៊ុំ កំសត់ ថាអាចឈ្នះចេង គា ?៕
កម្ពុជាថ្មី
វិសិទ្ធ
No comments:
Post a Comment