រដ្ឋាភិបាលក្រុងព្យុងយ៉ាង បានប្រកាសថា អាចបាញ់សាកល្បងមីស៊ីលប៉ាលីស្ទីកឆ្លងទ្វីបគ្រប់ពេលដែលកូរ៉េខាងជើងចង់ធ្វើ់ ដែលការប្រកាសនេះ ក៏មិនបានធ្វើឲ្យអាមេរិកនៅស្ងៀមឡើយ ដោយក្រុងវ៉ាស៊ីនតោន អះអាងថានឹងបាញ់មីស៊ីលនោះទម្លាក់ចោលតែម្តង។ ក៏ប៉ុន្តែក្រុងប៉េកាំង មិនមានចំណាត់ការអ្វីឡើយ ពោលគឺ ក្រុងប៉េកាំង បន្តធ្វើជាអ្នកតាមដានស្ថានការណ៍ និងទទូចឲ្យភាគីរក្សាភាពស្ងៀមស្ងាត់ប៉ុណ្ណោះ។
អ្នកនាំពាក្យក្រសួងការបរទេសចិន លោក Lu Kang នៅថ្ងៃទី៩ មករា បានថ្លែងក្នុងសន្និសីទសារព័ត៌មានប្រចាំថា ក្រុងប៉េកាំង បានដឹងលឺពីដំណឹងដែលថា កូរ៉េខាងជើង អាចនឹងបាញ់សាកល្បងមីស៊ីលធុនធ្ងន់ជាថ្មី ហើយ ក្រុងប៉េកាំង ក៏ពិតជាបារម្ភចំពោះស្ថានភាពនោះផងដែរ។ មិនខុសពីពេលមុនៗ ក្រុងប៉េកាំង បានបន្តពណ៌នាស្ថានភាពឧបទ្វីបកូរ៉េថាមានភាពស្មុគស្មាញ និងរសើប។
ជាងនេះទៅទៀតនោះ តាមរយៈអ្នកនាំពាក្យដដែលនោះ ក្រុងប៉េកាំង ក៏បានទទូចឲ្យភាគីពាក់ព័ន្ធបញ្ឈប់សកម្មភាព ឬការថ្លែងសុន្ទរកថាដែលធ្វើឲ្យស្ថានភាពកាន់តែធ្ងន់ធ្ងរ។ យ៉ាងណាក៏ដោយ ចិន មិនមានវិធានការអ្វីដើម្បីតបតទៅនឹងសកម្មភាពកូរ៉េខាងជើងឡើយ ដោយគ្រាន់តែបញ្ជាក់ថា៖«ចិន នឹងចាំតាមដានចំពោះការអភិវឌ្ឍនៃស្ថានភាព និងបន្តការងារដើម្បីសន្តិភាព និងស្ថិរភាពក្នុងតំបន់»។
យោងតាមសារព័ត៌មានកូរ៉េខាងត្បូង Yonhap អ្នកនាំពាក្យក្រសួងការបរទេសកូរ៉េខាងជើងដែលមិនបញ្ចេញឈ្មោះម្នាក់ បាននិយាយថា ក្រុងព្យុងយ៉ាង បានអភិវឌ្ឍក្បាលគ្រាប់នុយក្លេអ៊ែរស្តង់ដារួចហើយដែរ។ អ្នកនាំពាក្យនោះ បានបន្ទោសអាមេរិកថា បានបន្តសកម្មភាពបង្កហេតុមកលើខ្លួន ហើយរឿងនេះជាមូលហេតុដែលបង្ខំខ្លួនឲ្យអភិវឌ្ឍអាវុធនោះ។
អ្វីគួរកត់សម្គាល់នោះ ការប្រកាសខាងលើនេះ ធ្វើឡើងក្រោយពេលមេដឹកនាំកំពូល គីម ជុងអ៊ុន ប្រកាសថា កូរ៉េខាងជើង បានមកដល់ដំណាក់កាលចុងក្រោយនៃការរៀបចំសាកល្បងមីស៊ីលអន្តរទ្វីប (ICBM) ។ ប្រសិនបើសាកល្បងជោគជ័យ មីស៊ីលអន្តរទ្វីបនេះ មានសមត្ថភាពបាញ់ដល់ទឹកដីអាមេរិក ដែលមានចម្ងាយជាង៩ពាន់គីឡូម៉ែត្រពីកូរ៉េខាងជើង។ មីស៊ីលប្រភេទនេះ អាចបាញ់គោលដៅក្នុងរង្វង់អប្បរមា៥ពាន់គីឡូម៉ែត្រ និងអាចបង្កើនសមត្ថភាពវាយប្រហារគោលដៅចម្ងាយលើសមួយម៉ឺនគីឡូម៉ែត្រផងដែរ។
ដូចសព្វមួយដងអាមេរិក ដែលជាអាណាព្យាបាលសន្តិសុខរបស់ជប៉ុន និងកូរ៉េខាងត្បូង មិនបណ្តែតបណ្តោយឲ្យកូរ៉េខាងជើង ធ្វើតាមចិត្តឡើយ។ រដ្ឋមន្ត្រីការពារជាតិអាមេរិក Ashton Carter នៅថ្ងៃទី៨ មករាកន្លងទៅ បានអះអាងថា អាមេរិកនឹងបាញ់ទម្លាក់មីស៊ីលកូរ៉េខាងជើងដែលហោះសំដៅទឹកដីអាមេរិក។ ក្នុងកិច្ចសម្ភាសន៍មួយជាមួយសារព័ត៌មាន NBC ប្រមុខការពារជាតិអាមេរិករូបនេះបញ្ជាក់ថា អាមេរិក នឹងបាញ់ទម្លាក់មីស៊ីលដែលបាញ់ដោយកូរ៉េខាងជើង ក្នុងករណីមីស៊ីលនោះ បាញ់តម្រង់មកកាន់អាមេរិក ឬទឹកដីរបស់សម្ព័ន្ធមិត្តអាមេរិក។
លោក Carter សង្កត់ធ្ងន់ថា អាមេរិកបាញ់ទម្លាក់មីស៊ីលណាដែលជាការគំរាមសន្តិសុខអាមេរិក និងសម្ព័ន្ធមិត្តប៉ុណ្ណោះ។ តែបើមីស៊ីលកូរ៉េខាងជើង បាញ់តម្រង់ចូលសមុទ្រនោះ ក្រុងវ៉ាស៊ីនតោន នឹងមិនបាញ់ស្កាត់អ្វីឡើយ។ គេមិនទាន់ដឹងទេថា កូរ៉េខាងជើង នឹងបាញ់សាកល្បងមីស៊ីលរបស់ខ្លូននៅពេលណាឡើយ ប៉ុន្តែបើតាមព័ត៌មានលេចធ្លាយកន្លងមក កូរ៉េខាងជើង ទំនងជាបាញ់មីស៊ីល ពេល ប្រធានាធិបតី ដូណាល់ ត្រាំ ស្បថចូលកាន់តំណែង៕
ថ្មីៗ
អត្ថបទ : ថ្មីៗ
No comments:
Post a Comment